នាថ្ងៃព្រហស្បតិ៍ទី២៩ ខែមករា ឆ្នាំ២០២៦ នៅសភាទីក្រុងប៉ូតហ្គោរីកា ប្រទេសម៉ុងតេណេហ្រ្គោ ឯកឧត្តម អ៊ុំ សារឹទ្ធ ប្រធានគណៈកម្មការទី៩ព្រឹទ្ធសភា និងជាសមាជិកគណៈកម្មាធិការត្រួតពិនិត្យ និងតាមដានប្រជាធិបតេយ្យនៃសភាប្រើភាសាបារាំង (Comité de vigilance démocratique de l’Assemblée parlementaire de la francophonie-APF) បានអញ្ជើញចូលរួមកិច្ចប្រជុំគណៈកម្មាធិការត្រួតពិនិត្យ និងតាមដានប្រជាធិបតេយ្យ ស្តីពី ការពិនិត្យ និងផ្តល់យោបល់លើសេចក្តីព្រាងក្រមសីលធម៌មន្រ្តីអគ្គលេខាធិការដ្ឋាននៃសភាប្រើភាសាបារាំង ក្រោមអធិបតីភាពលោក Guillaume CHEVROLLIER ប្រធានគណៈកម្មការ នយោបាយAPF និងជាសមាជិកព្រឹទ្ធសភាបារាំង។ សមាសភាពនៃក្រុមការងារនេះ មានតំណាងមកពី៤តំបន់៖ អាស៊ី-ប៉ាស៊ីហ្វិក (មាន ឯកឧត្តម អ៊ុ សារឹទ្ធ) អាមេរិក (លោកស្រី Marilyne PICARD តំណាងរាស្រ្តកាណាដា) អាហ្រ្វិក (លោក Assan Seibou តំណាងរាស្រ្តសាធារណរដ្ឋប្រជាធិបតេយ្យកុងហ្គោ) និងតំណាងអឺរ៉ុប (លោក Jean-Paul Whal តំណាង រាស្រ្តនៃសភាសហព័ន្ធវ៉ាឡូនីព្រុចសែល-ប៊ែលហ្ស៊ិក) (លោក Carlo SOMMARUGA តំណាង រាស្រ្តសី្វស) និង(លោក Michel WOLTER តំណាងរាស្រ្តនៃសភាតំណាងរាស្រ្តលុចសំបួរ)។
នៅក្នុងកិច្ចពិភាក្សានេះ អង្គប្រជុំបានឯកភាពសេចក្តីស្នើវិសោធនកម្មរបស់ឯកឧត្តម អ៊ុ សារឹទ្ធ ផងដែរ ដូចជា៖ និយមន័យនៃការទទួលវត្ថុអនុស្សាវរីយ៍ និយមន័យនៃពាក្យក្រមសីលធម៌ និងការចុះហត្ថលេខាចូលជាធរមាននៃសេចក្តីព្រាងក្រមសីលធម៌ ជាដើម។
អង្គប្រជុំបានអនុម័តជាឯកច្ឆ័ន្ទបញ្ជូនសេចក្តីព្រាងក្រមសីលធម៌ដើម្បីសុំការអនុម័តយល់ព្រម នៅក្នុងកិច្ចប្រជុំគណៈកម្មាធិការប្រតិបត្តិនៃAPF ដែលនឹងប្រព្រឹត្តទៅថ្ងៃទី៣០ និងទី៣១ ខែមករា ឆ្នាំ២០២៦ ខាងមុខនេះ។

ប្រភព៖ នាយកដ្ឋានកិច្ចការហ្វ្រង់កូហ្វូន
សម្រួលខ្លឹមសារ៖ នាយកដ្ឋានព័ត៌មាន